ياعيـن ياللـي حايـره ماتناميـن=طول الليالـي ساهـره ماتنومـي 


ياطول ماانتـي فالطبيعـه تلديـن=لكن بـدا حظـك يطيـح ويقومـي 


ياعين وين اللي من العـام تغليـن=اهـل المكـارم طيَّبيـن السلومـي 


ياعين مالومـك علـى الدارتبكيـن=تبكيـن دار معطريـن السهومـي 


الله من وقت(ن) مضى يطرب العين=اليوم عندي مثل وصف الحلومـي 


قالواعلامك مـا تفـل الحجاجيـن=قلت آه من قلب(ن)طوته الهمومـي 


قالوا تبى مصر مـربَّ المزاييـن=قلت آه ماهي ديرتي يـا لقرومـي 


قالوا تبى البصره وذيـك البساتيـن=قلت آه ما تطفي لهيـب السمومـي 


قالوا تبى نجد(ن) ديار السلاطيـن=قلت آه هي طبَّ العلل والسقومـي 


يا نجد يا دار الصقـور الشياهيـن=يامنبع النخـوه وسـاس العزومـي 


يا نجد يا ديرة هل العـز والديـن=حناعليك اشفق من امّ(ن) رحومـي 


اليا ذكرت ربوعـي اللـي وفييّـن=قامن دموعـي يغرقـن الهدومـي 


يازين جلستهـم بذيـك الدواويـن=كيف وسواليف(ن) تزيل الهمومـي 


ياليتني في دارهم خاطـري زيـن=القلب يدله عند ربـع(ن) قرومـي 


لكـن عنهـم فـي بـلاد بعيديـن=ديـرة معـزه ياعساهـا تدومـي 


يالله ياجابـر عظـام الكسيـريـن=يالواحد اللي لك نحـج ونصومـي 


افرج لعبدك ساعـة العسروالليـن=ياخيَّر(ن) نرجيـه دايـم ودومـي 


وصلوا على المختار سيـد النبييّـن=اعداد ماغـاب القمـر والنجومـي