في داخلي حسره لطفله يتيمه = تلعبها الاقدار مدري على وين


الوقت قاسي والاماني عقيمه = واحساس غربه في وجود الملايين


قصة حنين واسالفه مستديمه = حطت على جرح المقادير جرحين


صارت خليط من الجروح المقيمه = بين الرجاء والياس والعسر والين


لحظه اليمه يعلم الله اليمه = لا شفت دمعتها على محجر العين


على رصيف الذكريات القديمه = حل الظلام وجف عطر الرياحين


خيبت اماني وانكسار وهزيمه = بين البعيد وبين ظلم الموالين


لو كان في وجه المساحات شيمه = ماضايقت حظ القلوب المساكين


متى على الله يتبع السيل ديمه = واشوف للفرحه بوادر عناوين


يالله عجل بالفرج والغنيمه = يافارج الكربه وياقاضي الدين


ورحم بغفوك كل طفله يتيمه = تلعبها الاقدار مدري على وين